Hjón fundust látin á bóndabæ

Hjón á miðjum aldri fundust látin á bóndabæ í Kent á Englandi á miðvikudagskvöldið og höfðu verið skotin til bana með haglabyssu. Tvær haglabyssur fundust á vettvangi og bendir frumrannsókn lögreglu til þess að maðurinn hafi skotið konu sína til bana og sjálfan sig á eftir. Hjónin voru nýflutt á bóndabæinn en höfðu áður verið búsett í Ashford. Fyrrum nágranni þeirra þar sagði í viðtali við Telegraph að konan hefði nýlega lent í alvarlegu bílslysi og þau flutt skömmu síðar.