Lögmaður skipti um nafn til að vernda börnin sín

„Ég er í raun og veru bara að starfa hjá litlu fyrirtæki og reyna að vinna fyrir mér og minni fjölskyldu," segir Skúli Sigurðsson héraðsdómslögmaður. Fréttavefur DV greinir frá því í dag að Skúli, sem áður hét Hlynur Skúli Auðunsson, væri til sérstakrar skoðunar hjá Lögmannafélagi Íslands sem hafi óskað eftir því að réttindi hans verði afturkölluð. Ástæðan sé gjaldþrot Skúla en hann hafi einnig hlotið dóm. Hann skipti um nafn fyrir þremur árum. Hann segir ástæðuna hafa verið þá að vernda börnin sín fyrir umfjöllun.

Skúli segir það alls ekki vera ætlun sína að vera að gera eitthvað sem hann megi ekki. Það hafi legið fyrir að hann væri lögmaður. „Ég tilkynnti Lögmannafélaginu í vor þegar ég fór að praktisera um að ég væri að praktisera," segir Skúli. Lögmannafélagið hafi ítrekað rukkað sig um félagsgjöld og í vor hafi hann fengið stefnu vegna ógreiddra félagsgjalda. Skúli segir því óumdeilt að hann sé fullgidlur lögmaður. „Það er enginn að deila um það. Þetta er þá bara spurningin um það hvort ég uppfylli skilyrði til þess að vera lögmaður áfram," segir Skúli.

Ingimar Ingason, framkvæmdastjóri Lögmannafélags Íslands, segir að það komi öðruhvoru fyrir að lögmenn verði gjaldþrota. Í slíkum tilfellum fullnægi lögmaður ekki skilyrðum fyrir lögmannsréttindum og þá beri Lögmannafélaginu skylda til að tilkynna slíkt til dómsmálaráðuneytisins. Hefð hafi skapast fyrir því að upplýsingar um gjaldþrot berist félaginu frá dómstólum eða skiptastjórum úr þrotabúum. Af einhverjum ástæðum hafi slíkar upplýsingar ekki skilað sér í þessu tilfelli.