Endurspegla breytingar á VR

Stjórn VR ákvað í gær að skipta út fulltrúum félagsins í stjórn Lífeyrissjóðs verzlunarmanna. Þar með mun stjórnarformaðurinn, Páll Gunnar Pálsson, fyrrverandi formaður VR, fara úr stjórn lífeyrissjóðsins.

„Við viljum endurspegla þær breytingar sem orðið hafa á stjórn VR í kjölfar kosninganna [til stjórnar VR] í stjórn lífeyrissjóðsins,“ segir Kristinn Örn Jóhannesson, formaður VR. Hann segir að ekki megi skilja skipti á stjórnarmönnum sem gagnrýni á störf fráfarandi stjórnarmanna.

Inn í stjórnina koma þau Ragnar Önundarson, Stefanía Magnúsdóttir, Ásta Rut Jónasdóttir og Benedikt Vilhjálmsson. Stjórn lífeyrissjóðsins skiptir með sér verkum, en Kristinn segist vonast til þess að sátt verði um að Ragnar verði stjórnarformaður.

„Við erum búin að tilnefna nýtt fólk í stjórnina. Í framhaldinu þarf að senda erindi til sjóðsins og Fjármálaeftirlitið þarf að samþykkja breytingarnar,“ segir Kristinn.

Fram kom í máli fundarmanna á aðalfundi lífeyrissjóðsins í gærkvöldi að ólöglegt sé að skipta út stjórnarmönnum áður en kjörtímabil þeirra renni út. Kristinn segir að samkvæmt lögfræði­áliti sem unnið hafi verið fyrir VR sé það rangt. Fordæmi séu fyrir breytingum á stjórn á miðju tímabili.

Á aðalfundinum í gær kom einnig fram að vegna góðrar stöðu sjóðsins þurfi ekki að skerða greiðslur úr sjóðnum, þrátt fyrir neikvæða afkomu í fyrra. - bj