Hálaunafólk þiggur bætur

Dæmi eru um að hálaunafólk, sem vinnur minna en fulla vinnu vegna skerts starfshlutfalls, sæki um tekjutengdar atvinnuleysisbætur frá Atvinnuleysistryggingasjóði til viðbótar launum sínum. Enn sem komið er eru engin ákvæði sem kveða á um að laun fólks þurfi að vera undir ákveðnu marki til að það geti sótt um hlutabæturnar. Þetta segir segir Gissur Pétursson, forstjóri Vinnumálastofnunar. Í nóvember síðastliðnum samþykkti Alþingi lagabreytingu sem veitir heimild til að greiða fólki í hlutastarfi tekjutengdar atvinnuleysisbætur í lengri tíma en áður.

Hámarkshlutabætur vegna skerts starfshlutfalls eru 120.000 krónur á mánuði í hálft ár, sé miðað við að starfshlutfall bótaþega hafi verið minnkað úr 100 prósentum niður í 50 prósent. Lágmarks grunnatvinnuleysisbætur eru tæplega 150.000 krónur á mánuði. Munar því um 30.000 krónum á lágmarks grunnatvinnuleysisbótum og hámarksbótum vegna minnkaðs starfshlutfalls. „Ég get nefnt sem dæmi að einhverjir tugir manna, sem fóru úr einni milljón á mánuði fyrir fullt starf niður í hálfa milljón fyrir hálft starf, fá að auki greiddar 120.000 krónur á mánuði í hálft ár í bætur vegna skerts starfshlutfalls. Einhverjir myndu nú segja að það væri býsna rausnarlegt," segir Gissur.

Árni Páll Árnason félagsmálaráðherra segir ætlunina með ákvæðinu um tekjutengdar atvinnuleysisbætur hafa verið að forðast atvinnuleysi. Kerfið sé í stöðugu endurmati og þess verði að gæta að úrræði af þessum toga séu ekki misnotuð. „Það þarf að passa upp á að í þessum tilfellum sé raunverulega verið að minnka starfshlutfall og afstýra þannig atvinnuleysi. Atvinnuleysistryggingasjóður á ekki að niðurgreiða óhjákvæmilegar launalækkanir fyrirtækja."

Að sögn Árna er að óbreyttu reiknað með að Atvinnuleysistryggingasjóður tæmist um mánaðamótin október-nóvember. „Í samstarfi við Ríkisskattstjóra er verið að leggja grunn að sérstöku átaki, þar sem bæði verður tekið á svikum á atvinnuleysisbótum og svartri atvinnustarfsemi," segir Árni Páll Árnason.