Forskot íhaldsmanna minnkar

Ný könnun sýnir að forskot breska Íhaldsflokksins á Verkamannaflokkinn hefur ekki verið minna í heilt ár. Breska blaðið Guardian lét fyrirtækið ICM gera könnunina og kemur í ljós að forskot íhaldsmanna er aðeins níu prósent, en minni munur hefur ekki mælst í könnunum frá því í desember 2008. Blaðið telur ljóst að þetta auki líkurnar á því að Gordon Brown forsætisráðhera Breta boði til kosninga fyrr en seinna.

Níu prósenta munur ætti að duga David Cameron og félögum hans í íhaldsflokknum til þess að ná naumum meirihluta en könnunin blæs Verkamannaflokknum samt von í brjóst um að ekki sé öll nótt úti enn fyrir flokkinn sem hefur hríðfallið í áliti almennings undanfarin misseri.

Íhaldsflokkurinn mælist nú með 40 prósent atkvæða, Verkamannaflokkurinn með 31 prósent og Frjálslyndir demókratar með 18 prósent. Fyrir tveimur mánuðum síðan var bilið á milli stóru flokkanna tveggja 17 prósent.

Talið er líklegt að blásið verði til kosninga 25 mars á næsta ári en hingað til hefur verið talið að 6. maí yrði fyrir valinu. Forsætisráðherrann ræður kjördeginum alfarið sjálfur, svo lengi sem kosningarnar dragast ekki fram yfir 3. júní 2010.