Sex ný svínaflensu tilfelli

Sex tilfelli verið staðfest á Íslandi af nýju inflúensunni A(H1N1) síðustu tvo sólarhringa og hefur hún því greinst hjá samtals 29 einstaklingum frá því í maí síðastliðnum.

Um er að ræða tvo 15 ára gamla pilta sem komu til landsin 19. júlí síðastliðinn frá Gautaborg en þar höfðu þeir tekið þátt í fótboltamóti, 17 ára gamla stúlku frá Spáni sem tekið hafði þátt í skátamóti hér á landi, 17 ára gamla stúlku sem ekki hefur ferðast erlendis og óljóst er um tengsl við smitaða einstaklinga, 27 ára gamlan karlmann og 27 ára gamla konu. Hvorugt þeirra tveggja síðastnefndu hefur ferðast erlendis og óljóst er um tengsl þeirra við smitaða einstaklinga. Enginn þessara sex sjúklinga var með alvarleg einkenni og eru þeir allir á batavegi.

Almannavarnardeild Ríkislögreglustjóra og Sóttvarnarlæknir vilja vekja athygli á því að framundan er mesta ferðamannhelgi ársins og mikið um mannamót. Með hliðsjón af því að inflúensan er tiltölulega væg um þessar mundir hafi engin tilmæli verið gefin um samkomubann. Engu að síður sé rétt að vekja athygli á því að allir sem eru með inflúensulík einkenni eigi að halda sig heima í sjö daga frá upphafi þeirra, fara vel með sig og forðast að smita aðra. Þótt inflúensan sé yfirleitt væg sé nauðsynlegt að hafa í huga að fólk með undirliggjandi sjúkdóma getur verið viðkvæmari fyrir henni en þeir sem hraustir eru og fengið alvarleg einkenni.