Hummer-ökumaður játar sök

Í morgun játaði Jón Kristinn Ásgeirsson að hafa ekið Hummer-bifreið á 26 ára gamlan meistaranema í lögfræði og valda honum ævarandi örkumlun í janúar síðastliðnum.

Jón hefur einnig verið ákærður ásamt Karli Halldóri Hafsteinssyni og Ríkharð Júlíusi Ríkharðssyni fyrir íkveikju í húsi við Kleppsveg í byrjun júní. Einn maður var í húsinu þegar þeir kveiktu í. Hann var í bráðri lífshættu og komst naumlega út. Mennirnir eiga yfir höfði sér allt að sextán ára fangelsi, minnst tvö ár.

Það var um nótt, þriðju helgina í janúar, sem Jón Kristinn ók Hummer-jeppa Ásgeirs Þórs Davíðssonar, föður síns, niður Laugaveginn. Bíllinn var merktur Steak & Play, veitingastað í eigu Ásgeirs. Nokkrir voru með Jóni Kristni í bílnum.

Á gatnamótunum við Vegamótastíg ók hann á 26 ára meistaranema í lögfræði og slasaði hann alvarlega. Jón Kristinn ók síðan af vettvangi. Lögreglan hafði hendur í hári hans skömmu síðar.

Laganeminn var meðvitundarlaus þar til fyrir skömmu. Hann er verulega skaðaður eftir að keyrt var á hann og sýnir takmörkuð viðbrögð vegna áreitis. Hann var í lífshættu um tíma.

Nú dvelur hann á Grensásdeild Landspítalans. Ekki er víst að hann komist nokkru sinni út í samfélagið á ný.

Til er upptaka af slysinu úr verslun úrsmiðsins Franks Michelsens við Laugaveg, sem hefur verið notuð við rannsókn málsins.

Jón Kristinn hefur nú setið í gæsluvarðhaldi í rúman mánuð vegna íkveikjunnar á Kleppsvegi ásamt þeim Karli og Ríkharði.

Þar var maður á miðjum aldri hætt kominn. Hann komst út af eigin rammleik áður en húsið varð alelda. Húsið gjöreyðilagðist við brunann.

Í gæsluvarðhaldsúrskurðum yfir fólkinu kom fram að í bíl þeirra, sem var fyrir utan húsið við Kleppsveg, fannst listi yfir fíkniefnaskuldir.

Fyrirtaka var í málinu í morgun þar sem Hummer-málið var sameinað íkveikjunni. Aðalmeðferð fer fram síðar í vikunni.