Hreinni rigning í Noregi

Minna fellur í dag af súru regni í Noregi en nokkrusinni síðan á miðjum sjöunda áratug síðustu aldar.

Norska blaðið Aftenposten segir að Umhverfisstofnun landsins reki það til minni útblásturs á breinnisteins- og köfnunarefnissamböndum í Evrópu.

Það hefur leitt til þess að súlfat í rigningu í Noregi hefur minnkað um áttatíu prósent. Það hefur svo aftur leitt til þess að tegundir sem ekki þola súra rigningu eru að ná sér aftur á strik.

Enn er þó langt í land því botndýr og krabbadýr í norskum ám og vötnum þurfa langan tíma til þess að jafna sig.

Norðmenn hafa lagt sitt af mörkum til þess. Um 1970 var brennisteinsútblástur þar um 150 þúsund tonn á ári.

Norðmenn skuldbundu sig til þess að minnka hann niður í 22 þúsund tonn fyrir árið 2010. Því markmiði hefur þegar verið náð.