Lögreglumaður dæmdur í 18 ára fangelsi fyrir morð

Tæplega þrítugur breskur lögreglumaður hefur verið dæmdur til 18 ára fangelsisvistar fyrir að myrða unnustu sína sem einnig var í lögreglunni. Atvikið átti sér stað í Manchester í byrjun maí. Maðurinn var fundinn sekur um að hafa banað unnustu sinni með um það bil fjórtán hamarshöggum í höfuð og efri hluta líkamans. Hann setti svo á svið bílslys og gaf þær skýringar að konan hefði hlotið höfuðáverkana þegar höfuð hennar skall í rúðuna en hún hafi ekki verið í öryggisbelti. Rannsóknarlögreglumenn drógu þessar skýringar í efa og játaði maðurinn að lokum að hafa myrt konuna. Hann gaf þá skýringu að hann hefði verið í tygjum við barnsmóður sína samhliða hinu sambandinu og ekki þolað tilfinningalegt álag sem því fylgdi.