Neistaflugið enn til staðar

Titanic-parið Kate Winslet og Leonardo DiCaprio leiða aftur saman hesta sína í hinni dramatísku Revolutionary Road sem verður frumsýnd á morgun.

Mörgum er eflaust enn í fersku minni ástarsamband Winslet og DiCaprio í hinni ógnarvinsælu Titanic árið 1997. Neistaflugið á milli þeirra var umtalað og átti tvímælalaust stóran þátt í vinsældum myndarinnar.

Síðan þá hefur vegur þeirra beggja aukist jafnt og þétt og skín stjarna þeirra skærar núna en nokkru sinni fyrr, sérstaklega Winslet sem hampaði nýlega tvennum Golden Globe-verðlaunum. Voru önnur þeirra einmitt fyrir frammistöðuna í Revolutionary Road.

Á þessum tólf árum síðan Titanic gerði allt vitlaust hafa peningamenn í Hollywood beitt öllum brögðum til að fá gamla dúettinn til að endurvekja töfrana en án árangurs, allt þar til nú. Skipti þar eflaust mestu máli að leikstjóri myndarinnar er enginn annar en eiginmaður Winslet, hinn virti Sam Mendes sem á að baki fín verk á borð við American Beauty, Road to Perdition og Jarhead. Revolutionary Road fjallar um April og Frank, ung hjón með tvö börn í úthverfi Connecticut um miðjan sjötta áratuginn. Þrátt fyrir að allt sé slétt og fellt á yfirborðinu finnst þeim eitthvað vanta í lífið. Frank skaffar vel í skrifstofustarfi sem honum hundleiðist og April átti sér drauma um að verða leikkona en sinnir nú húsmóðurstörfum. Þau taka sig til og ákveða að flytja til Frakklands í von um nýtt og betra líf. Þessi umbreyting gengur aftur á móti afar brösuglega með sífelldum rifrildum sem gætu mögulega bundið enda á samband þeirra.

Myndin fær mjög góða dóma í erlendu pressunni og svo virðist sem neistinn á milli Winslet og DiCaprio hafi hvergi nærri dofnað. Myndin fær 7,9 af 10 mögulegum á síðunni Imdb.com og 67% á Rottentomatoes.com.

- fb