Fjölbreytnin í fyrirrúmi í Eurovision

Þriðji skammtur af Euro­visionlögum ársins verður borinn fyrir landsmenn á laugardaginn, fjögur lög að vanda.

Fyrst er „Close to you" eftir Grétar Sigurbergsson geðlækni. Lagið er djassskotin ballaða sungin af þriggja barna móður, Kristínu Ósk Wium. Hún gerði garðinn frægan í Bugsy Malone söngleiknum en syngur nú með fríkirkjukórnum í Hafnarfirði.

Eina lag kvöldsins á íslensku er næst, „Lygin ein" eftir Albert G. Jónsson. Þetta er nútímalegt popplag sem Kaja Halldórsdóttir syngur. Hún söng í ýmsum Versló-söngleikjum og sendi frá sér plötuna Away from me árið 2005.

Næst í röðinni er amerískt kántrí­rokk í anda The Eagles, „Easy to fool" eftir Torfa Ólafsson með texta eftir Þorkel Olgeirsson. Þar er sungið um rútuferð með Greyhound til Maine - ekki alveg týpískt Eurovision!

Arnar Jónsson, áður í Lúxor er í aðalhlutverki, en annar fyrrverandi Lúxorkappi. Edgar Smári, leggur honum lið. Auk þess syngja synir Torfa í laginu, þeir Sverrir Baldur og Ólafur. Síðasta lagið er „Family", annað lagið sem Óskar Páll Sveinsson keppir með í ár. Hann er þegar farinn áfram með lagið sem Jóhanna Guðrún syngur. „Family" er hressileg soul-ballaða sungin af Seth Sharp, sem nokkuð hefur fengist við Eurovisionsöng til þessa.