Hudson langþreytt á ljósmyndurum

Kate Hudson hefur bæst í hóp þeirra stórstjarna sem fengið hafa sig fullsaddar af paparazzi-ljósmyndurum. Í samtali við tímaritið Elle segir Kate að henni sé skapi næst að berja frá sér að hætti Bjarkar. „Þeir leggja á sig alveg ótrúlegustu hluti til að ná myndum. Og ég hef oft verið nærri því að lemja þá,“ segir Kate við tímaritið.

Leikkonan hefur verið vinsælt myndefni, allt frá því að hún sló í gegn í kvikmyndinni Almost Famous. Ekki minnkaði áhuginn þegar hún byrjaði með Owen Wilson en skildi svo við hann með þeim afleiðingum að leikarinn reyndi að stytta sér aldur. Auk þess eru paparazzar ákaflega áhugasamir um son leikkonunnar, Ryder, en hann er fjögurra ára gamall. „Þetta eru ekki góðir menn. Þegar þú ert að reyna að fara í skólann og þeir brjóta sér leið inn á skólalóðina þá vaknar sú þörf að vilja berja einhvern,“ segir Kate.