Ótrúleg handvömm íslenskra stjórnvalda

„Við í InDefence erum afar óánægð með vinnubrögð Alþingis varðandi þá fyrirvara sem liggja Icesave samningnum til grundvallar. Við höfum heimildir fyrir því að þrátt fyrir gagnrýni InDefence hópsins um að fyrirvararnir muni ekki halda fyrir breskum dómstólum voru ekki kallaðir til sérfræðingar í breskri lögsögu til að fara yfir þá fyrirvara sem samþykktir voru á Alþingi í dag," segir Ólafur Elíasson, meðlimur InDefence hópsins í samtali við Vísi.

Meðlimir InDefence hópsins sátu á nefndarfundum með fjárlaganefnd, utanríkisnefnd og efnahags- og skattanefnd Alþingis til að koma skilaboðum sínum á framfæri. Að sögn Ólafs var tekið mark á þeim athugasemdum sem hópurinn kom á framfæri við nefndirnar á nefndarfundunum en svo virðist sem álit hópsins hafi ekki verið athuguð nánar að þeim fundum loknum í öllum tilvikum.

Ólafur segist afar óhress með vinnubrögð ríkisstjórnarinnar í málinu og segir vinnubrögð hennar hafa verið gífurlega hroðvirknisleg allt frá upphafi þessa máls.

„Við gerðurm allt til að lágmarka skaðann á þessu með aðkomu okkar í nokkrum nefndum Alþingis. Við lögðum til tvo lögfræðinga sem aðstoðuðu ríkisstjórnina við að skrifa fyrirvara en það breytti ekki því að frá okkar sjónarhóli var ekki verið að vinna þessa vinnu eins ítarlega og augljóst er að þurfi að gera í svo slíku máli. Allt tal um vönduð vinnubrögð Alþingis hljóta að hljóma eins og brandari þegar engir sérfræðingar í breskum lögum voru látnir lesa fyrirvarana," segir Ólafur.

„Undir það síðasta fengum við lögfræðiálit frá Dr. Michael Waibel, sérfræðingi í alþjóðarétti við Cambridge háskóla um fyrirvara Icesave samningsins. Að hans mati eru miklar líkur á því að Bretar séu komnir með rétt til að ganga að eigum ríkisins samkvæmt Icesave samningunum sem eru í raun óbreyttir verði ríkisábyrgðin gefin. Samningarnir veita Bretum og Hollendingum aðfararheimild að eigum ríkisins standi ríkið ekki við skuldbindingar sínar," segir Ólafur.

Hann segir að InDefence hópurinn þurfi að hamast í þessu næstu árin. „Við styðjum ekki þessa niðurstöðu Alþingis, hún er ekki sú lausn sem við lögðum til og við munum halda áfram að kynna málstað Íslendinga erlendis varðandi þetta mál," segir Ólafur Elíasson að lokum.