Vilja gufubað við Laugarvatn í sumar

Viðræður eru í gangi um að koma á fót bráðabirgða­aðstöðu fyrir gufubað á Laugarvatni í sumar. Viðræður standa yfir um afnot af húsnæði, en niður­staða liggur ekki fyrir. Gufa ehf., sem hyggur á rekstur heilsulindar á svæðinu, kemur ekki að vinnu við mögulega bráðabirgðaaðstöðu.

„Það er verið að skoða möguleikana á því að koma upp bráðabirgðaaðstöðu. Sú athugun er í fullum gangi og í sjálfu sér ekkert meira um málið að segja á þessari stundu,“ segir Hafþór Guðmundsson, hjá Hollvinasamtökunum.

Ekki hefur verið gufubað við Laugarvatn síðan 2007 þegar gamla aðstaðan var rifin. Fyrirhugað er að reisa nýja og glæsilega heilsulind á svæðinu og gerðu fyrstu áætlanir ráð fyrir að hægt yrði að opna aðstöðuna í fyrrahaust. Kristján Einarsson, framkvæmdastjóri Gufu ehf., sagði í samtali við Fréttablaðið í fyrra, að mögulega yrði hægt að hefja starfsemi vorið 2010.

Kristján segir fyrirtækið ekki koma að hugmyndum um bráðabirgðaaðstöðu, en hann vonist til að hægt verði að fara í gufu á Laugarvatni í sumar. „Þetta er með skilningi okkar, ef af verður. Við viljum viðhalda gufumenningunni á staðnum.“

Kristján segir lán í óláni að framkvæmdir hafi ekki verið hafnar fyrir lánsfé þegar kreppan skall á í fyrra. Fyrirtækið eigi sitt hlutafé og verið sé að vinna að því að auka það. Fullur hugur standi til að fara í verkefnið um leið og hægt er. Hann segist ekki geta sagt hvenær það verði, enda gangi hægar með fjármögnun nú vegna ástandsins.

„Við erum vongóðir um að það komi inn nýir aðilar, en ástandið núna er þannig að fjármagn er ekki beint á lausu. En sem betur fer fórum við ekki af stað í fyrra með stór erlend lán á framkvæmdinni. Stór hluti væri þá farinn núna.“

Hafþór tekur undir það og segir víða leitað fanga eftir fjármagni. „Það eru allar teikningar tilbúnar og um leið og við fáum fjármagn inn í verkið getum við hafist handa.“

Vegur um Lyngdalsheiði var boðinn út í maí í fyrra og eru verklok áætluð árið 2010. Aðstandendur gufubaðsins vonast til þess að með honum verði styrkari stoðum skotið undir rekstur gufubaðsins.kolbeinn@frettabladid.is