Bretar duglegir að nota Keflavíkurflugvöll

Rúmlega 50 flugvélar á vegum breska hersins hafa nýtt sér aðstöðuna á Keflavíkurflugvelli frá því Bretar beittu hryðjuverkalögum gegn Íslandi.

Til stóð að breski flugherinn tæki að sér loftrýmisgæslu við Ísland í lok síðasta árs. Íslensk stjórnvöld afþökkuðu hins vegar þá aðstoð eftir að bresk stjórnvöld beittu hryðjuverkalögum gegn Íslandi.

Á síðustu 12 mánuðum hafa 53 flugvélar á vegum breska flughersins millilent og fengið þjónustu á Keflavíkurflugvelli. Um er ræða herþotur og flutningavélar.

Þegar Bretar beittu hryðjuverkalögum gegn Íslandi líktu margir því við beina stríðsyfirlýsingu. Bresk stjórnvöld hafa enn ekki upplýst hvers vegna þessum lögum var beitt gegn annarri Nató þjóð.

Bretar hafa einnig hótað Íslendingum efnahagsþvingunum vegna Icesave málsins og talaði fjármálaráðherra um grímulausar hótanir í því sambandi á Alþingi fyrir nokkrum dögum.

En er það eðlilegt að Íslendingar haldi áfram að þjónusta breskar herflugvélar eins og ekkert hafi í skorist?

„Við erum aðilar að Nató. Bretar eru líka aðilar að Nató. Við höfum reyndar notað Nató til að mótmæla harkalega framferði Beta gagnvart okkur en á meðan þetta er gert í krafti alþjóðlegra samninga þá hugsa ég að það sé ekki óeðlilegt," segir Össur Skarphéðinsson, utanríkisráðherra.