Breyting á dreifingu Fréttablaðsins

Frá og með 1. apríl nk. verða gerðar breytingar á dreifingu Fréttablaðsins. Með breytingunum er fest í sessi dreifing blaðsins til yfir 90 prósenta þjóðarinnar á höfuðborgarsvæðinu og helstu þéttbýlisstöðum á landsbyggðinni. Til þessa hefur dreifing blaðsins verið tryggð til 93 prósenta þjóðarinnar. Fréttablaðið verður borið út til 80 þúsund heimila sem nemur 75 prósentum allra heimila. Að auki verður blaðið aðgengilegt í Fréttablaðskössum, sem finna má í hverfum valinna þéttbýlisstaða eða á völdum dreifingar-stöðum.

Við val á dreifingarstöðum var horft til dreifingarkostnaðar og lestrarmælinga. Á suðvesturhorninu, frá Borganesi til og með Selfossi, verða minniháttar breytingar, sú helsta sú að dreifingu í hús verður hætt á Kjalarnesi og Álftanesi en íbúum þar verður í staðinn boðin uppsetning Fréttablaðskassa. Dreifingu verður hætt á Snæfellsnesi og Vestfjörðum, sem og afskekktari byggðalögum landsins. Blaðinu verður áfram dreift til heimila á Akureyri auk þess sem dreifing helst óbreytt á Sauðárkróki, Blönduósi og öðrum þéttbýlisstöðum á leiðinni frá Borgarnesi til Akureyrar að Dalvík og Húsavík viðbættum. Á Austurlandi verður blaðinu áfram dreift á Seyðisfirði, í Neskaupstað, á Eskifirði, Reyðarfirði og Egilsstöðum. Dreifing á Suðurlandi verður til og með Hvolsvelli, að Vestmannaeyjum meðtöldum, en hætt verður dreifingu á Suðausturlandi.

Þessa óhjákvæmilegu takmörkun á dreifingu má rekja til aukins útgáfukostnaðar Fréttablaðsins, eins og annarra dagblaða, á síðustu misserum á sama tíma og samdráttur hefur verið á auglýsingamarkaði. Gripið hefur verið til víðtækra ráðstafana á síðustu mánuðum til að stemma stigu við þessari þróun. Markmiðið með þeim er framar öðru að tryggja til frambúðar að Fréttablaðið verði öflugasta dagblað landsins. Í dag lesa 64 prósent landsmanna á aldrinum 12 til 80 ára blaðið daglega, sem er um 50 prósenta meiri lestur en á Morgunblaðinu, sem jafngildir 49 þúsundum fleiri lesendum daglega. Sé litið til helsta viðmiðunarhóps auglýsenda í aldurshópnum 18 til 49 ára eru yfirburðir Fréttablaðsins enn meiri eða 98 prósent. Í haust hófst uppsetning Fréttablaðskassa úti á landi. Sú nýbreytni hefur mælst vel fyrir. Rætt verður við fleiri sveitarstjórnir um uppsetningu Fréttablaðskassa.