Vinnuhópur skipaður til að vinna úr tillögum Jännäris

Ríkisstjón Íslands fjallaði á fundi sínum í morgun um skýrslu finnska bankasérfræðingsins, Kaarlos Jännäris, sem birt var í gær. Í henni gerir Jännäri grein fyrir athugunum sínum á lagaumhverfi og framkvæmd fjármálaeftirlits hér á landi, um leið og hann leggur fram tillögur til úrbóta í átta liðum. Ákveðið hefur verið að stofna starfshóp sem mun vinna úr tillögum Finnans.

„Ríkisstjórnin fagnar vinnu Jännäris og hefur ákveðið að skipa starfshóp til að vinna úr ábendingum hans svo hrinda megi skynsamlegum tillögum í framkvæmd sem fyrst. Hópurinn verður skipaður fulltrúum þriggja ráðuneyta og á að skila ríkisstjórn tillögum eigi siðar en 15. apríl," segir í yfirlýsingu frá forsætisráðuneytinu.

Þá segir að á fundinum í morgun hafi ríkisstjórnin einnig rætt einnig stöðu þingmála, en enn bíða fjölmörg mikilvæg mál afgreiðslu á þinginu. „Lögð er áhersla á af hálfu stjórnarinnar að klára sem flest af þeim málum sem lögð hafa verið fram af hennar hálfu og snerta aðgerðir til að greiða úr brýnum vanda eða nauðsynlegar umbætur lýðræðismála. Af þessum sökum er enn óljóst hvenær þingi lýkur," segir að lokum.