Guðmundur næsti þjálfari Selfoss

Knattspyrnudeild Selfoss hefur boðað til blaðamannafundar þar sem tilkynnt verður um ráðningu þjálfara meistaraflokks karla. Samkvæmt heimildum Vísis verður það Guðmundur Benediktsson, leikmaður KR.

Guðmundur hefur verið orðaður við þjálfarastöðuna hjá Selfoss síðan að Gunnlaugur Jónsson hætti hjá félaginu og tók við Val nú fyrir fáeinum vikum.

Fyrr í sumar var Guðmundur sjálfur orðaður við Val eftir að Willum Þór Þórsson var látinn fara en KR vildi ekki sleppa Guðmundi þá.

Kristján Guðmundsson og Tómas Ingi Tómasson voru einnig orðaðir við þjálfarastöðuna á Selfossi. Tómas Ingi er nýtekinn við HK en Kristján hætti á dögunum hjá Keflavík.