Safna fyrir bágstaddar konur í Suður-Afríku

Söfnunarátak Enza hjálparsamtakanna nær hámarki í Smáralindinni á morgun, laugardaginn 31. október, með fjölbreyttri dagskrá listamanna. Dagskráin stendur yfir frá klukkan tvö til fjögur.

Í tilkynningu frá Enza kemur fram að samtökin hafi fengið styrk frá Auði Capital fyrr á árinu til að festa kaup á húsnæði undir Enza-skólann sem starfræktur er í fátækrahverfi skammt frá Höfðaborg í Suður-Afríku. Nú sé verið að safna fyrir rekstri skólans og tímabundnu heimili fyrir skjólstæðinga Enza.

Sjö íslenskar konur standa á bakvið starfsemina. Ein þeirra er búsett á svæðinu og sér um starfið sem byggir á menntun og fræðslu til stúlkna og kvenna sem neyðast til að gefa frá sér nýfædd börn sín vegna fátæktar og/eða útskúfunar.

Enza samtökin segja að í mörgum tilfellanna sé stúlkunum nauðgað, en Suður-Afríka hefur þann vafasama heiður að vera það land þar sem nauðganir eru flestar á heimsvísu. Þar er konu nauðgað á 17 sekúndna fresti samkvæmt könnun Gallup.

„Verði konurnar ófrískar í kjölfar nauðgunarinnar eru þær gjarnan gerðar ábyrgar fyrir nauðguninni og oftar en ekki útskúfaðar út af skömm yfir því að vera barnshafandi utan hjónabands. Yfirleitt eiga stúlkurnar ekki afturkvæmt. Allt niður í 11 ára gamlar stúlkur eru þannig neyddar út í barneignir, því vegna skorts á heilsugæslu uppgötva þær oft ekki að þær eru barnshafandi fyrr en of seint er að framkvæma fóstureyðingu. Söfnunin miðar að því að fá mánaðarleg framlög fyrir rekstri skólans og að festa kaup á húsnæði sem verður tímabundið heimili fyrir stúlkurnar á meðan þær eru að fóta sig í tilverunni," segir í tilkynningunni frá Enza.