Sjómenn ósáttir við niðurskurð hjá Gæslunni

Sjómenn hafa margoft gert athugasemdir við skerta starfsemi Landhelgisgæslunnar, segir Sævar Gunnarsson, formaður Sjómannasambands Íslands.

Eins og Vísir greindi frá fyrr í dag er útlit fyrir að einungis ein þyrluáhöfn verði tiltæk á vakt frá 12. september til mánaðamóta í stað tveggja eins og verið hefur undanfarin tvö ár. Ástæðan er sú að vegna niðurskurðar hjá Landhelgisgæslunni hafa stjórnendur hennar sagt upp þyrluflugmönnum og öðrum starfsmönnum að undanförnu.

Sævar sagðist ekki hafa heyrt af þessu þegar Vísir náði tali af honum. Hins vegar gagnrýndu sjómenn alltaf ef skera ætti niður þjónustu hjá Landhelgisgæslunni. „Við erum búnir að því margsinnis, bæði formlega og óformlega, að gera athugasemdir," segir Sævar. Sjómenn láti málefni sem þetta sér ekki óviðkomandi. „Þetta er okkar sjúkrabíll," segir Sævar.