Vitni að ákeyrslu: Hummerinn hægði aldrei á sér

„Þetta var bara hræðilegt, ótrúlega ljótt," segir vitni sem sá þegar Hummer-bifreið ók á mann á þrítugsaldri fyrir tveimur helgum. Atvikið átti sér stað á Laugaveginum um klukkan hálf fjögur um nóttina.

Ökumaður bílsins flúði af vettvangi eftir að hafa ekið manninn niður. Vitnið segir Hummerinn hafa verið stóran en honum fannst hann hafa verið á óvanalega mikilli ferð á leiðinni niður götuna. Hummerinn hægði aldrei á ferðinni eftir að hafa ekið á manninn.

„Ég var að ganga niður Laugaveginn þegar ég sá bílinn koma á talsverðri ferð niður götuna. Síðan heyri ég bara skellinn og sé þá manninn liggja á götunni," segir vitnið sem er dauðbrugðið eftir atvikið. Hann segist hafa hlaupið að slysstaðnum þar sem maðurinn lá. Hann sá þrjá menn stumra yfir honum en þeir reyndust félagar mannsins.

„Ég hringdi þá strax í 112," segir vitnið og segir aðspurður að lögreglan og sjúkrabíll hafi verið fljót á vettvang. Maðurinn var kominn í sjúkrabílinn og lagður af stað upp á spítala á innan við fimmtán mínútum.

Spurður segir vitnið að hann hafi ekki séð inn um bílgluggann, en það hafi ekki verið flókið að lýsa bílnum, „Þetta var stór Hummer, en ég held að einhverjir aðrir hafi séð númerið," segir hann.

Að sögn vitnisins hægði ökumaður jeppans aldrei á sér eftir að hafa ekið piltinn niður, heldur hafi hann gefið í og beygt út fyrstu hliðargötuna sem varð á vegi á hans.

„Aðkoman var mjög ljót. Þetta er bara rosalega sorglegt," segir vitnið sem er talsvert brugðið eftir að hafa orðið vitni af atburðinum.

Lögreglan fann ökumann bifreiðarinnar daginn eftir með hjálp sjónarvotta. Maður á þrítugsaldri var handtekinn í kjölfarið og játaði hann að hafa verið undir stýri.

Manninum sem ekið var á er enn haldið sofandi á gjörgæslu og er í lífshættu.

Þegar haft var samband við lögregluna fengust þau svör að rannsókn miði vel.

Aðspurður hvort hann hafi fengið áfallahjálp eftir að hafa komið að slysstað svarar vitnið: „Ég fékk ekki aðstoð en miðað við aðstæður þá kæmi mér ekki á óvart að fólk leitaði sér aðstoðar eftir að hafa orðið vitni af þessu."