Fíkniefnamálið er harmsaga

„Þetta er harmsaga sem vindur ofan á sig og það er verið að rembast við að vinda ofan af henni," segir Sigurður Hilmar Ólason. Hann fékk í gær tilkynningu frá Ríkissaksóknara um að fíkniefnamál gegn honum yrði látið niður falla. Sigurður var grunaður um að hafa staðið að innflutningi á umtalsverðu magni af amfetamíni til landsins og sat í gæsluvarðhaldi um þriggja vikna skeið í júní vegna þess.

Hann segist hafa orðið fyrir umtalsverðum óþægindum vegna málsins enda á Sigurður fjölskyldu og hefur verið í atvinnurekstri á undanförnum misserum. „Málið sem má kalla dularfulla fíkniefnamálið var nú ekki dularfyllra en svo að það var ekkert fíkniefnamál," segir Sigurður.

Ríkissaksóknari var jafnframt með til skoðunar meint peningaþvætti og var það mál rannsakað samhliða rannsókninni á meintum fíkniefnainnflutningi. Ríkissaksóknari hefur ekki tekið ákvörðun um framhald þess hluta málsins.