Krabbameinsgen kortlögð

Breskir vísindamenn hafa kortlagt genabyggingu tveggja tegunda krabbameins, húðkrabba og lungnakrabba. Þeir segja að þetta geti valdið byltingu í lækningum á þessum sjúkdómum.

Vísindamennirnir starfa við Wellcome Trust Sanger Institute. Þeir hafa einangrað þá sérstöku stökkbreytingu í DNA sem getur leitt til hættulegra æxla.

Þeir segja að með þessu verði hægt að veita fólki sérhæfða meðferð sem gagnist því sérstaklega. Einnig verði hægt að rannsaka frumur með gallað DNA og framleiða sterkari lyf til þess að vinna gegn þeim.