Söng í Gleðibankaskóm mömmu

Elísabet Ormslev, 16 ára dóttir Helgu Möller söngkonu, varð í 2. sæti í Samfés-keppninni sem fram fór á laugardaginn þegar hún söng lagið Unbreak my heart.

Elísabet söng í skóm Helgu, móður sinnar, sem hún notaði þegar hún flutti lagið Gleðibankinn í Bergen í Noregi fyrir Íslands hönd.

Vísir hafði samband við mæðgurnar til að óska Elísabetu til hamingju og ekki síður til að spyrja um heillaskó Helgu Möller.

„Skórnir eru eins og nýir og alveg „inn" í dag. Það mætti í orðsins fyllstu merkingu segja að hún hafi verið að feta í mín fótspor," svarar Helga Möller hlæjandi aðspurð um skóna.

„Gleðibankaskórnir komu til umræðu þegar ég var að ákveða í hverju ég ætti að vera á sviðinu og þegar ég var búin að ákveða að vera í svörtum kjól, sem er í miklu uppáhaldi hjá mér, stakk mamma upp á því að vera í „Júróvisjón skónum" sem hún var í á sviðinu í Bergen," útskýrir Elísabet.

„Mammma stökk niður í kjallara, gramsaði í öllu draslinu sem var þar og á endanum fann hún skóna sem áttu að vera fyrir „good luck"," segir Elísabet.

„Ég var ekki alveg viss um það og hugsaði um leið í hæðni: Good luck já? Ég lendi örugglega bara í 16. sæti eins og hún þá, sem mér fannst fyndið," segir Elísabet.

„Síðan var ég ekki alveg viss um hvort mig langaði að vera í skónum en ákvað það nú samt á endanum að það væri svolítið skemmtilegt og þeir voru líka svo ótrúlega töff."

„Já, ég var mjög stressuð, með rosalegan hnút í maganum þegar ég labbaði fram á sviðið. En þegar það leið á lagið þá fór mér að líða betur. Allt gekk vel á endanum," segir Elísabet brosmild og jákvæð eins og mamma hennar.