Heimir og Kolla á BBC

„Maður er eiginlega alveg orðinn ruglaður. Ég held að ég sé bókaður í viðtöl langt fram eftir kvöldi," segir morgunhaninn Heimir Karlsson. Lopapeysusöfnun útvarpsþáttarins Ísland í bítið virðist sanna fyrir fullt og allt að Íslendingar bera engan kala til Breta. 

Í gærkvöldi sigldi nefnilega Arnarfellið áleiðis til Hull með tuttugu tonn af hvers kyns lopavörum, rúma fimmtíu rúmmetra af lopapeysum, síðbrókum, húfum og vettlingum. Heimir segir áhuga breskra fjölmiðla á þessari einstöku söfnun vera með ólíkindum.

Hann velti því jafnvel fyrir sér hvort tími sé kominn til að ráða fjölmiðlafulltrúa. „Daily Telegraph, Daily Mail og Fokal-Radio í Stoke hafa öll haft samband í dag," útskýrir Heimir sem hafði lítinn tíma til að spjalla enda bókaður í annað viðtal aðeins nokkrum mínútum seinna.  

BBC sjónvarpar ekki beint frá því þegar skipið kemur með gáminn. Heimir og Kolla verða ekki viðstödd þegar skipið leggur að landi.  

Þau fara út á miðvikudag til Hull og á fimmtudag taka þau á móti gámnum og verður BBC þá á staðnum og tekur við þau viðtal sem þeir senda út á föstudagsmorgninum í morgunþættinum.  

Breskir blaðamenn hafa velt því fyrir sér hvers vegna í ósköpunum Íslendingar séu að leggja Bretum lið, svona í ljósi þess að bresk yfirvöld, með Gordon Brown fremstan í flokki, settu hryðjuverkalög á landið. Heimir svarar því yfirleitt til að þetta séu óskyld mál.

„Okkur fannst bara skelfilegt til þess að hugsa að gamalmenni í vestrænu ríki væru að frjósa úr kulda," segir Heimir sem tekur þó fram að það hafi verið íslenskir feðgar, sem búsettir eru á Englandi, sem settu sig í samband við þau og þannig fór boltinn af stað.