Rafn Andri til Vejle á reynslu

Rafn Andri Haraldsson, leikmaður Þróttar, fer um helgina til Danmerkur þar sem hann verður til reynslu hjá B-deildarliðinu Vejle í eina viku.

Samningur Rafns Andra við Þrótt rennur út um næstu áramót og því verður honum frjálst að ræða við önnur lið frá og með 15. október næstkomandi.

Hann á að baki 69 leiki og sex mörk í deild og bikar með Þrótti en liðið féll úr Pepsi-deild karla í haust.

„Ég heyrði eitthvað af áhuga Vejle í sumar en það varð ekkert meira úr því þá. Þeir höfðu svo samband aftur um daginn," sagði Rafn Andri í samtali við Vísi. „En mér líst vel á þetta. Ég held að þetta sé flottur klúbbur."

Rafn Andri hefur verið orðaður við önnur lið hér á Íslandi og þá helst Fylki. „Ég hef ekkert rætt við önnur íslensk lið og er bara að hugsa um að standa mig vel hjá Vejle þessa stundina."