Útilokar ákvarðanir í anda Einars K.

Tillögur Hafrannsóknastofnunarinnar fela í sér að þorskveiðikvótinn verði tíu þúsund tonnum minni en nú er.

Atli Gíslason, formaður sjávarútvegs- og landbúnaðarnefndar, segir að með tillögunum sé Hafrannsóknastofnunin í raun að auka þorskveiðikvótann frá því í fyrra um tuttugu þúsund tonn. „Það voru ákveðin 130 þúsund tonn fyrir síðasta fiskveiðiár en Einar K. Guðfinnsson [fyrrverandi sjávarútvegs­ráðherra] tók það upp hjá sér í febrúar rétt fyrir stjórnarslit að bæta við þrjátíu þúsund tonnum,“ segir Atli. „Það er mín skoðun að lífríki eigi að njóta vafans. Það er betra að ganga ekki á höfuðstólinn.“

Atli telur að þessar breytingar séu nauðsynlegar, þrátt fyrir bágt efnahagsástand. „Ef við tökum of mikið úr lífríkinu endum við eins og bankarnir. Við eigum ekki að vera í „loftbólubisness“ með auðlindirnar okkar í hafinu, við erum mjög brennd af því í bankastarfsemi. Við verðum bara að hugsa um sjálfbæra þróun og vistvænar veiðar og fara varlega,“ segir hann. „Ég treysti sér­fræðingum Hafrannsókna­­stofnunar­innar í þessu máli. Þeir hefðu mátt fá meiri peninga til rannsókna og annað slíkt en þetta eru áratugarannsóknir sem þeir byggja á. Þetta er markviss ráðgjöf hjá þeim ár eftir ár og við erum í stórhættu ef við fylgjum þeim ekki. Við eigum ekki að taka geðþóttaákvarðanir eins og Einar K. Guðfinnssson tók rétt fyrir stjórnarslit.“

Einar vísar því á bug að um geðþóttaákvörðun hafi verið að ræða. „Sú ákvörðun mín var vel rökstudd. Nú sjáum við líka á mati Hafrannsóknastofnunarinnar á stöðu þorskstofnanna að viðmiðunarstofnarnir í þorskinum eru að stækka, þannig að það er ljóst að ákvörðun mín frá því í vetur var fyllilega rökstudd og langt innan við öll mörk sjálfbærra veiða,“ segir hann. „Ég tel að það sé skynsamlegt að halda sig við þá ákvörðun sem ég tók á síðasta vetri. Þá var það tilkynnt af minni hálfu að gert væri ráð fyrir því að þetta væri ákvörðun til tveggja ára. Mín rök eru þau að 160 þúsund tonna afli væri vel innan marka sjálfbærrar nýtingar og við þessar efnahagslegu aðstæður sem við búum við núna held ég að það væri skynsamlegast að reyna að feta þá slóð.“

Einar Valur Kristjánsson, útgerðar­maður á Ísafirði og stjórnar­maður í LÍÚ, segir að Hafrannsóknastofnunin sé á réttri leið en betur má ef duga skal. „Ég er að vona að maður fái að sjá eitthvað meira en 150 þúsund tonn. Mínum skipstjórum finnst vera mikill fiskur. Við höfum ekki verið að veiða þorsk í mörg ár, við erum alltaf að flýja hann, þannig að manni finnst 150 vera í lægri kantinum. En stóra fréttin er að þetta er staðfesting á því að þetta er á réttri leið,“ segir hann.freyr@frettabladid.is