Tekist á um sunnlenska orku

Sjálfstæðismenn í Suðurkjördæmi halda kjördæmisþing á Hótel Selfossi í dag og hófst þingið klukkan 13. Samkvæmt heimildum Sunnlendings.is hyggjast sjálfstæðismenn í Árnessýslu bera fram tillögu á þinginu þess efnis að virkjuð orka á Suðurlandi verði nýtt til atvinnuuppbyggingar á Suðurlandi en ekki annarsstaðar. Á þinginu mun kjörnefnd jafnframt kynna tillögu að framboðslista Sjálfstæðisflokksins í Suðurkjördæmi vegna komandi kosninga til Alþingis.

Líklegt er að sjálfstæðismenn á Suðurnesjum taki dræmt í tillögu félaga sinna í Árnessýslu þar sem Suðurnesjamenn vilja að orkan verði nýtt til atvinnusköpunar á Suðurnesjum. Sveitarstjórnarmenn og almenningur á Suðurlandi krefst þess hins vegar í vaxandi mæli að sunnlensk orka verði nýtt í héraði. Stjórn Samtaka sunnlenskra sveitarfélaga (SASS) samþykkti bókun í þá veruna á fundi stjórnarinnar síðastliðinn fimmtudag.