Kona sakar fyrrverandi biskup um kynferðislegt áreiti

Kona sem var nemandi Ólafs heitins Skúlasonar fyrrverandi biskups segir hann hafa áreitt sig kynferðislega þegar hann kenndi við Réttarholtsskóla. Hún iðrast þess að hafa ekki sagt sögu sína fyrr en stígur nú fram til að styðja þær konur sem hafa verið í sömu sporum.

Sigrún Pálína Ingvarsdóttir var ein þriggja kvenna sem steig fram 1996 ári áður en Ólafur Skúlason sagði af sér biskupsembætti og greindi frá því að hann hafði áreitt sig kynferðislega. Hún greindi frá því í þættinum Sjálfstætt fólk að viðbrögð samfélagsins við þessum tíðindum hefðu á endanum hrakið hana úr landi.

Særós Guðnadóttir hefur nú ákveðið að segja sína sögu. Árið 1972 var hún 17 ára nemandi í Réttarholtsskóla þegar Ólafur var sóknarprestur í Bústaðakirkju og enskukennari við skólann. Hún segir að Ólafur hafi áreitt sig kynferðislega þegar hún þurfti að taka sjúkrapróf og með því rofið traust hennar.

Særós segist hvorki hafa haft kjark til að kæra Ólaf á þessum tíma né til að segja sína sögu þegar konurnar þrjár stigu fram árið 1996.

Hún segir ekki ætlunina að særa aðstandendur Ólafs en hafi fundið sterka þörf til að segja sannleikann og styðja við Sigrúnu Pálínu í baráttu hennar.

Ekki náðist í Biskupstofu við gerð þessarar fréttar.