Styrkur bara fyrir Íslendinga

Creighton-háskólinn í Omaha í Bandaríkjunum hefur ákveðið að styrkja Ragnheiði Á. Gunnars­dóttur í nám við skólann.

Háskólinn tók upp á því fyrir komandi skólaár að bjóða Íslendingi rausnarlegan styrk fyrir skólagjöldum og framfærslu. Að sögn Ragnheiðar var sú ákvörðun tekin vegna efnahagsástandsins á Íslandi. Hún veit ekki hversu margir sóttu um styrkinn, en segir mikinn heiður fyrir sig að hljóta hann og ótrúlegt tækifæri.

„Þetta er búið að vera mikið ævintýri. Ég fékk að vita að ég kæmist inn og fengi styrkinn 1. júlí og fer út 15. ágúst svo það er allt búið að vera á fullu,“ segir Ragnheiður. Hún mun dvelja í borginni Omaha næstu tvö árin og leggja stund á meistaranám í alþjóðasamskiptum. Fyrir er hún viðskiptafræðingur og hefur lagt áherslu á alþjóðamarkaðsfræði.

Það var varasendiherra Bandaríkjanna á Íslandi, Neil Klopfenstein, sem afhenti Ragnheiði skjal til staðfestingar styrknum. - þeb