Ferðamönnum mætti fjölga um 25%

Fjögur af fimm stærstu dagblöðunum í Bretlandi birtu greinar í helgarútgáfum sínum, þar sem Bretar voru hvattir til að nýta sér veikt gengi krónunnar til að gera hagstæð jólainnkaup á Íslandi. Í fréttatilkynningu frá Iceland Express segir að félagið hafi aldrei fengið jafn mikla umfjöllun í erlendum fjölmiðlum eins og síðustu daga, en umfjöllun um ódýrar verslunarferðir með félaginu til Íslands, hafi birst í yfir 100 ólíkum fjölmiðlum frá því á laugardag.

 

 

Vill átak til að fjölga ferðamönnum til landsins um 25%

Matthías Imsland, forstjóri Iceland Express, kallar eftir samhæfðum aðgerðum ferðaþjónustunnar og stjórnvalda til að fjölga ferðamönnum hingað til lands. Hann segir að með því að allir leggist á eitt, þá mætti fjölga ferðamönnum um allt að 25% milli ára, en þeir séu nú um 500.000. Þetta myndi þýða gríðarmikla innspýtingu gjaldeyris, auk þess sem að það fé sem varið yrði til þessa verkefnis væri góð fjárfesting til framtíðar.

Samningaviðræður standa yfir um nýjar þotur

Matthías segir að Iceland Express eigi í viðræðum um kaup á tveimur þotum af gerðinni Airbus A320. Félagið sjái fram á nokkra fjölgun þotna í þjónustu félagsins á næstu misserum, enda hafi sala farmiða aukist um 5% milli ára og bókanir fyrir desember-mánuð, sem dæmi, séu 10% meiri en í fyrra. Aukningin komi, sem fyrr segir, aðallega erlendis frá. Með þessari viðbót verði Iceland Express með einn yngsta flugflota allra flugfélaga í millilandaflugi til Íslands. Ef samningar náist, verði nýju þoturnar líklega afhentar strax á næsta ári. Verðmæti kaupsamningsins sé í kringum 6-7 milljarðar króna.