Grunur um að súrefniskútur hafi sprungið í áströlsku vélinni

Rannsóknarmenn ástölsku flugslysanefndarinnar beina nú sjónum sínum að þeim möguleika að súrefniskútur hafi sprungið og valdið skemmdunum á farþegavélinni sem þurfti að nauðlenda á Filippseyjum fyrir helgina. Stórt gat kom á búk vélarinnar skömmu eftir flugtak í Hong Kong.

Súrefniskútur var í farangursrými flugvélarinnar einmitt þar sem gatið kom á vélina og beinast sjónir manna því einkum að þeim möguleika.

Aðrir möguleikar hafa þó ekki verið útilokaðir. Það styður þessa tilgátu, að sumir farþeganna í vélinni hafa sagt að súrefnisgrímur þeirra hafi ekki virkað sem skyldi eftir að sprengingin varð undir farþegarýminu.

Áströlsku rannsóknarmennirnir njóta nú aðstoðar sérfræðinga frá Boeing verksmiðjunum og bandarísku flugslysanefndinni. Qantas hefur verið gert að athuga ástand allra súrefniskúta í vélum sínum.