Rússar hafna hugmyndum Georgíumanna um vopnahlé

Rússnesk stjórnvöld hafna alfarið hugmyndum Georgíumanna um vopnahlé í deilunni um Suður-Ossetíu að svo stöddu og segja Georgíumenn enn herja á Suður-Osseta.

Lítið virðist þokast í friðarátt og Vladímír Pútín, forsætisráðherra Rússlands, sagði í rússnesku sjónvarpi í morgun að Vesturlönd hefðu ruglast á því hver væri gerandinn og hver þolandinn í deilunni um Suður-Ossetíu. Þá sakaði hann Bandaríkjamenn um að aðstoða Georgíumenn við að koma georgískum hermönnum heim frá Írak til þess að taka þátt í átökunum.

Fyrr í dag gagnrýndu Bandaríkjamenn Rússa fyrir framgöngu þeirra í deilunni. Sagði Cheney, varaforseti Bandaríkjanna, að áframhaldandi árásir Rússa á Georgíumenn myndu hafa alvarleg áhrif á samskipti Rússa og Bandaríkjamanna og alþjóðasamfélagið. Árásir Rússa á georgísk skotmörk héldu áfram í nótt en tölur um mannfall í Suður-Ossetíu og Georgíu eru mjög á reiki.