Önnur þáttaröð vestanhafs

Önnur þáttaröð af Little Britain USA verður gerð fyrir Bandaríkjamarkað þrátt fyrir orðróm um að áhorfendur þar í landi hafi átt erfitt með að átta sig á húmornum og hafi fundist hann of dónalegur.

Matt Lucas, annar af höfundum Little Britain, vill ekki meina að þættirnir hafi verið umdeildir. Segir hann bandarísku sjónvarpsstöðina HBO, sem framleiddi þá, hafa verið mjög ánægða með útkomuna. Félagi hans David Walliams bætti við: „Þáttaröðin gekk mjög vel á HBO. Hún fékk mikið áhorf, góða dóma og allir voru virkilega ánægðir. Við erum virkilega glaðir og stoltir.“

Walliams játar að þættirnir reyni á þolrif áhorfenda en það sé þó ekki ætlunin. „Við reynum bara að skemmta fólki, ekki að misbjóða því. Mér finnst að ef fólk er ekki hrifið af þáttunum eigi það ekki að horfa á þá.“

Hann segir þá félaga ekkert hafa dregið undan í þáttunum þrátt fyrir að Bandaríkjamenn séu margir hverjir viðkvæmir. „Við höfðum allt þetta ógeðslega með. Það voru nokkur ruddaleg atriði en þannig er Little Britain bara.“

Matt Lucas er um þessar mundir að leika í myndinni Lísu í Undralandi í Hollywood ásamt Johnny Depp og Tim Burton. „Það er mjög gaman að heimsækja Los Angeles. Sólin skín og maður hittir stjörnurnar og getur fengið sér hamborgara í morgun-, hádegis- og kvöldmat. Og já, ég hitti líka Tom Cruise, Johnny Depp og Will Ferrell.“