Ekkert krepputal í jólaboði Forlagsins - myndir

Árlegt jólaboð Forlagsins var haldið síðastliðið föstudagskvöldið í veislusal Þróttar í Laugardal.

Ríflega 300 manns mættu til að samgleðjast með Forlagsfólkinu. Forlagið gefur út bækur undir merkjum JPV, Máls og menningar, Vöku-Helgafells og Iðunnar auk Forlagsins sjálfs.

Feðgarnir Jóhann Páll Valdimarsson og Egill Örn Jóhannsson fluttu stuttar tölur og þökkuðu samstarfsfólki innilega og Jóhann Páll sló á létta strengi og vitnaði í stjörnuspá dagsins um son sinn þar sem honum var ráðlagt að halda sig fjarri konum en samkvæmt eigin spá var honum ráðlagt að halda sig í fjölmenni þennan dag eins og raunin varð.

Rithöfundar og starfsfólk bókabúða, fólk úr menningarlífinu og aðrir sem starfa fyrir Forlagið gerðu sér glaðan dag til að fagna árangrinum.

Stemningin var ljúf og ríkulega var veitt í mat og drykk og fóru síðustu gestir ekki fyrr en að ganga tvö og allt krepputal víðs fjarri.