Íranar bjartsýnir á viðræður um kjarnorkumál

Utanríkisráðherra Íran, Manouchehr Mottaki sagðist í dag vera bjartsýnn á viðræður sem hefjast á morgun í Sviss um kjarorkuáætlun Írana og taldi hann þær gefa vísbendingar góða þróun þeirra mála framundan.

Tilgangur samningaviðræðanna er að finna út hvað Írönum finnst um að tilboð Vesturlanda um efnahagslegt samstarf og samninga í stað þess að þeir láti af áætlun sinni um auðgun úrans. Mottaki telur þróun viðræðanna vera góða og vonast til þess að sá jákvæði andi muni lita afrakstur viðræðanna.

Mottaki hefur áður lýst yfir ánægju sinni um þá ákvörðun Bandaríkjamanna að taka þátt í viðræðunum. Ríkisstjórn Bush Bandaríkjaforseta hefur fyrr neitað öllum viðræðum við Íran nema þeir hætti þegar í stað auðgun úrans. Nú hafa þeir hins vegar sent aðstoðarutanríkisráðherra sinn William Burns til samningaviðræðanna.

Bandaríkjamenn skáru á öll stjórnmálatengsl við Íran eftir íslömsku byltinguna þar í landi 1979 og hafa ásakað Írana um að vera að búa til kjarnavopn sem Íranar hafa staðfastlega neitað.