Myndir birtar af árásinni í Sýrlandi - engin börn

Myndirnar eru teknar á farsíma og gæðin eru því ekki sérlega mikil. Á þeim sjást þyrlur á sveimi yfir býlinu í Sýrlandi, sem ráðist var á.

Þyrlurnar sjást ekki lenda en hinsvegar sjást lík undir yfirbreiðslum eftir árásina.

Að sögn sjónarvotta lentu tvær af fjórum þyrlum við býlið og sérsveitarmenn þustu skjótandi út.

Sýrlensk stjórnvöld segja að maður og fjögur börn hans, auk einnar konu hafi verið skotin til bana. Embættismenn á svæðinu segja hinsvegar að sjö menn hafi verið skotnir til bana og tveir aðrir særst. Fréttamaður Associated Press fréttastofunnar sem var viðstaddur útförina á mánudag segir að hann hafi séð lík sjö fullorðinna karlmanna.

Bandarískur embættismaður hefur sagt að árásin hafi verið gerð til þess að stöðva endalaust flæði erlendra vígamanna yfir landamærin til Íraks. Sýrlendingar hafi ekki sinnt ítrekuðum beiðnum um að herða gæslu á landamærum sínum.