Chavez vonast til að Obama sigri

Leiðtogar heimsins binda mismiklar vonir við breytingar í Bandaríkjunum með nýjum forseta sem kjörinn verður á næstu klukkustundum.

Eins og gefur að skilja mun það ekki bara skipta máli fyrir Bandaríkjamenn heldur alla heimsbyggðina enda eru ítök Bandaríkjamanna og áhrif víða.

Gordon Brown, forsætisráðherra Bretlands, segir sama hvort Obama eða McCain vinni, Bandaríkin verði áfram í forystu í baráttunni við hina alþjóðlegu fjármálakreppu. Þá segjast Hamas-samtökin í Palestínu tilbúin til viðræðna við báða frambjóðendur um deiluna fyrir botni Miðjarðarhafs.

Hugo Chavez, forseti Venesúela, bindur hins vegar miklar vonir við að Obama sigri í nótt en það geti glætt vonir um betri samskipti á milli landanna. Ef McCain vinni verði hins vegar áfram átök, sagði Chavez í dag. Grunnt hefur verið á því góða með Chavez og núverandi valdhöfum í Hvíta húsinu. Sendiherra Venesúela í Washington var kallaður heim í september og segist Chavez ekki munu senda hann til baka fyrr en húsbóndaskipti verði í Hvíta húsinu.