Slæmar horfur í N-Kóreu

Hungurvofan ógnar nú lífi og velferð milljóna manna í Norður-Kóreu vegna mikilla flóða og uppskerubrests. Matvælahjálp Sameinuðu þjóðanna segir að ástandið þar sé nú verra en nokkru sinni síðan hungursneyðin mikla felldi hundruð þúsunda fyrir um áratug.

Talsmenn matvælahjálparinnar segjast telja að fimm til sex miljónir manna í Norður-Kóreu þurfi matargjafir næstu 3-4 mánuði, eða fram að næstu uppskeru. Mikil flóð í landinu á síðasta ári hafa valdið stórfelldum uppskerubresti sem gæti orðið að vannæringu milljóna manna.

Norður-Kórea hefur ekki getað brauðfætt sig í rúman áratug, eða allt síðan miklar hamfarir gengu yfir landið á miðjum síðasta áratug. En hamfarirnar voru ekki eina ástæðan. Kínversk stjórnvöld ákváðu á þessum árum að taka fyrir endalaus og óafturkræf lán til nágrannaríkisins og jafnframt var vöruskiptafyrirkomulag milli Norður-Kóreu og kommúnistaríkjanna í Evrópu farið fyrir bí með hruni kommúnismans.

Aðeins er hægt að rækta á um 13% land í Norður-Kóreu, enda landið fjöllótt og berangurslegt, einkum í norðurhlutanum.

Stjórnvöld í Pyongyang hafa nú heimilað matvælahjálpinni að hefja dreifingu matvæla til fólks í átta af tíu héruðum landsins, eða til rúmlega 6 milljóna manna. Til þessa hafa Sameinuðu þjóðirnar fætt liðlega milljón manns.

Matvæladreifing í landinu er öll á vegum ríkisins. Undanfarna mánuði hafa matarskammtar minnkað og verðlag hækkað verulega. Verð á hrísgrjónum innanlands hefur þrefaldast og verð á korni fjórfaldast. Laun hafa hinsvegar staðið í stað. Þrjár af hverjum fjórum fjölskyldum hafa ekki nóg að borða.