Leiðtogar í herskrúðgöngu í París

Leiðtogar frá Evrópu, Miðausturlöndum og Norður Afríku sóttu herskrúðgöngu á Bastilludeginum í Frakklandi í dag. Heiðursgestur skrúðgöngunnar var aðalritari Sameinuðu Þjóðanna, Ban Ki-moon. Tveir friðargæslumenn Sameinuðu Þjóðanna leiddu hergönguna sem hefð er fyrir á Bastilludeginum.

Bastilludagurinn kemur í kjölfar fundar sem var þessa helgina þar sem Nicolas Sarkozy Frakklandsforseti leiddi stofnun Miðjarðarhafsbandalagsins. Af þeim sökum voru margir ríkisleiðtogar samankomnir í París og tóku þátt í hátíðarhöldunum á þessum þjóðhátíðardegi Frakka. Tilgangur bandalagsins er að bæta tengsl á milli Evrópusambandsins og ríkja í Miðausturlöndum og Afríku sem liggja við Miðjarðarhafið.

Gagnrýnt hefur verið að Sarkozy skyldi bjóða forseta Sýrlands Bashar Assad til fundarins en Sýrland hefur verið sakað um að styðja við bakið á ýmiss konar hryðjuverkastarfsemi. Viðvera Sýrlandsforsetann hefur farið fyrir brjóstið á mörgum fyrrverandi hermönnum í Frakklandi sem saka Sýrland um að hafa staðið á bak við sprengjuárás í Beirút 1983 sem varð 58 frönskum hermönnum að bana.