Hryðjuverkalögin nauðsynleg gegn íslenskum bönkum

Gordon Brown forsætisráðherra Bretlands var harðorður í garð íslenskra yfirvalda á Sky News fyrir stundu. Hann lagði áherslu á það að íslensk stjórnvöld bæru ábyrgð á því sem íslenskir bankar með höfuðstöðvar á Íslandi væru að gera í Bretlandi. Hann varði þá ákvörðun yfirvalda að frysta eignir íslenskra banka í Bretlandi á grundvelli svokallaðra hryðjuverkalaga.

Brown sagði nauðsynlegt að beita hryðjuverkalögunum þegar sparifé landsmanna væri ógnað og ekki væri á stefnuskránni að aflétta umræddum lögum.

Forsætisráðherrann sagði einnig að verið væri að hefja rannsókn á stórfelldum peningaflutningum frá London til Íslands á síðustu dögum.

Brown talaði einnig um að mikilvægt væri að inneignir breskra sveitarfélaga í íslenskum bönkum í Bretlandi yrðu tryggðar.