Ekki kom til átaka í valdaráninu í Máretaníu

Fyrrverandi yfirmaður lífvarða forseta Máretaníu hefur rænt völdum í landinu. Herinn lét til skarar skríða eftir að fjórir hershöfðingjar voru reknir úr starfi í gær.

Ekki kom til neinna átaka þegar hermenn handtóku Sidi Abdallahi forseta og Yahya Waqef forsætisráðherra í morgun. Hermenn sáust víða á götum og útsendingar sjónvarps og útvarps voru stöðvaðar um stund.

Hinsvegar var birt yfirlýsing frá valdaræningjunum á al-Arabiya sjónvarpsstöðinni í Miðausturlöndum. Var hún kölluð yfirlýsing númer eitt. Þar sagði Abdallahi væri ekki lengur forseti og að brottrekstur hershöfðingjanna hefði verið afturkallaður.

Stofnað hefði verið ríkisráð sem Mohamed Abdelaziz hershöfðingi stjórnaði. Hann var einn þeirra sem var rekinn í gær úr stöðu sinni sem yfirmaður lífvarða forsetans.

Stjórnarskipti eru ekki fátíð í Máritaníu. Stjórn hins nú fallna forseta tók við árið 2007 af herforingjastjórn sem hafði rænt völdum árið 2005.

Máritanía er stórt land, yfir ein milljón ferkílómetra að flatarmáli, eða tíu sinnum stærra en Ísland. Það er að mestu eyðimörk. Malbikaðir vegir eru þar ekki nema um 800 kílómetrar. Íbúar eru um 3.1 milljón. Þeir eru nær allir múslimar.

Þeir lifa einkum á fiskveiðum og landbúnaði og námuvinnslu. Olíuvinnsla hófst árið 2006 og er því spáð að hún muni gerbreyta efnahag landsins.