Olmert áfram rannsakaður vegna gruns um spillingu

Lögreglan í Ísrael heldur áfram rannsókn sinni á ásökunum um spillingu á hendur forsætisráðherra Ísrael, Ehud Olmert. Kemur fram í sameiginlegri yfirlýsingu frá lögreglu og dómsmálaráðuneyti landsins að hann sé grunaður um að tvöfalda kostnað við ferðir hans erlendis sem greiddar voru af almannafé.

Þetta fé á Olmert að hafa notað til þess að kosta ferðir til útlanda með fjölskyldu sinni. Hann hefur ekki svarað þessum síðustu ásökunum en hefur neitað fyrri ásökunum.

Áður hafði Olmert verið yfirheyrður þrisvar vegna ásakana. Hann hefur verið hvattur til að segja af sér en flokkur hans Kadima áætlar að halda leiðtogakosningu um miðjan september.

Í þriðju yfirheyrslunni var hann spurður út í ásakanir um að hafa gert bandarískum fjármálamanni að nafni Morris Talansky greiða í staðinn fyrir fé.

Talansky segist hafa látið forsætisráðherranum í hendur fé en ekki þegið neina greiða í staðinn. Hann segir hins vegar Olmert hafa notað það fé til einkanota og að féið hafi verið ætlað sem lán en hann hafi aldrei fengið endurgreitt. Olmert segir hins vegar að allt það fé hafa verið notað löglega í kosningaherferðir.