Lestarsprengjumenn sýknaðir á Spáni

Hæstiréttur Spánar hefur sýknað fjóra sakborninga sem undirréttur fann seka um að hafa átt þátt í neðanjarðarlestarsprengjutilræðunum í Madrid árið 2004 þar sem 191 lét lífið.

Hins vegar dæmdi rétturinn einn aðila sem undirréttur hafði sýknað. Sá er spænskur ríkisborgari og hlaut fjögurra ára dóm fyrir að hafa útvegað sprengiefnið sem notað var við hryðjuverkin sem áttu sér stað 11. mars 2004. Egyptinn Rabei Ahmed, sem lengi vel var talinn hafa verið höfuðpaurinn í árásinni og skipulagt hana að mestu leyti var fundinn sýkn saka í hæstarétti.

Meginástæðan fyrir því var þó ekki endilega sakleysi hans heldur sú staðreynd að ítalskur dómstóll hafði nýverið dæmt hann í átta ára fangelsi fyrir að tilheyra hryðjuverkasamtökum.