Sjö sakfelldir fyrir stríðsglæpi

Sjö Bosníu-Serbar hafa verið sakfelldir fyrir þjóðarmorð og dæmdir í fangelsi fyrir aðild sína að fjöldamorðunum á múslímum í Srebrenica í Bosníu sumarið 1995.

Stríðsglæpadómstóllinn í Sarajevo komst að þessari niðurstöðu en réttarhöldin hafa staðið í tvö ár. Þetta er í fyrsta sinn sem réttarhöld eins og þessi fara fram í Bosníu en áður hafa þau alfarið farið fram í Haag hjá stríðglæpadómstól Sameinuðu þjóðanna. Þegar réttarhöldin hófust í maí 2006 voru 11 ákærðir.

Mennirnir voru dæmdir fyrir að hafa átt þátt í að myrða yfir 1000 Bosníu-múslíma á einum degi. Alls voru rúmlega 8000 karlmenn og drengir drepnir í Srebrenica.