Le Clezio hlýtur bókmenntaverðlaun Nóbels

Franski rithöfundurinn Jean-Marie Gustave Le Clezio hlýtur bókmenntaverðlaun Nóbels í ár. Frá þessu var greint í morgun.

Le Clezio á ættir að rekja til Máritíus en faðir hans starfaði sem skurðlæknir í Afríku. Í seinni heimsstyrjöldinni varð faðirinn viðskila við móður hans en Le Clezio fæddist árið 1940 í Nice. Hann nam franskar bókmenntir við háskóla þar í borg en fluttist til Bandaríkjanna eftir nám og kenndi þar.

Hann varð frægur fyrir fyrstu skáldsögu sína, Le Proces-Verbal, árið 1963 en síðan þá hefur hann skrifað 30 bækur, smásögur, skáldsögur og fleira ásamt því að þýða. Meðal viðfangsefna hans hafa verið tungumálið og geðveiki og þótti uppreisnarbragur í skrifum hans. Um 1970 breytti hann um stefnu og fór að skrifa meira um æsku og ferðalög og náði þannig til stærri lesendahóps.

Í könnun sem gerð var árið 1994 á vegum franska bókmenntaritsins Lire töldu þrettán prósent lesenda hann besta núlifandi rithöfund Frakka. Það eru rúmlega 20 ár síðan franskur rithöfundur hefur fengið bókmenntaverðlaun Nóbels, enárið 1985 fékk Claude Simon verðlaunin. Þau nema tíu milljónum sænskra króna, rétt um hundrað milljónum íslenskra króna.

Í tilkynningu sænsku akademíunnar segir að Le Clezio hafi leitað nýrra leiða, ljóðrænna ævintýra og og nautnafulls algleymis. Hann hafi kannað hið mannlega utan hinnar ríkjandi menningar.