Kínverjar nafngreina hópa sem eru öryggisvandamál

Kínversk stjórnvöld hafa nafngreint fjóra hópa fólks sem þeir telja að geti ógnað örygginu í kringum komandi Olympíuleika í Bejing.

Múslímskir vígamenn hafa þegar sett fram hótanir um að hryðjuverk verði framin á leiknum en talið er að þar sé á ferð hópur með tengsl við al-kaída samtökin. Sjálfir nefna þeir sig Múslímskan flokk Turkistan.

Fyrir utan múslíma telja kínversk stjórnvöld að hópar á borð við tíbetska mótmælendur, stuðningsmenn Falun Gong og atvinnulausir verkamenn geti orðið til vandræða.

Öryggisráðstafanir Kínverja í kringum Olymjpíuleikana eru gífurlegar og gera yfirvöld allt sem í þeirra valdi stendur til að fullvissa gesti og keppendur um að öryggi þeirra verði borgið á leikunum.

Bejing borg hefur verið tæmd af því fólki sem gagnrýnt hefur stjórnvöld, kristnum meðlimum neðanjarðarkirkjunnar í Kína og venjulegum kínverskum borgurum sem komið hafa til Bejing til að kvarta undan kjörum sínum við stjórnvöld.