Barnaspítali Hringsins fær styrk

Barnaspítali Hringsins fékk í dag afhentan styrk að fjárhæð 750 þúsund krónur frá Avant. Það var Magnús Gunnarsson, framkvæmdastjóri Avant hf., sem afhenti styrkinn en hann rennur til starfsþróunarsjóðs Barnaspítalans. Í tilkynningu segir að þetta sé þriðja árið í röð sem Avant hf. styrkir spítalann með þessu hætti.

„Meginhlutverk Barnaspítala Hringsins er að hafa forystu í heilbrigðisþjónustu við börn og unglinga á Íslandi og veita veikum börnum og fjölskyldum þeirra þá bestu þjónustu sem mögulegt er. Samhliða þessu starfi er kennsla, fræðsla og rannsóknir órjúfanlegur þáttur starfseminnar. Þannig vill Barnaspítali Hringsins gegna forystuhlutverki á sviði heilbrigðisvísinda og rannsóknarstarfsemi sem tengist börnum og unglingum á landinu og annast um leið grunn- og framhaldsmenntun heilbrigðisstétta," segir í tilkynningunni.

Myndartexti: Á myndinni eru frá vinstri: Sigurður Kristjánsson, sviðsstjóri lækninga á barnasviði, Magnús Gunnarsson, framkvæmdastjóri Avant og Anna Ólafía Sigurðardóttir, sviðsstjóri hjúkrunar á barnasviði.