Georgíumenn fá 500 milljarða eftir átök við Rússa

Bæði samtök og einstök ríki hafa lofað Georgíumönnum 4,5 milljörðum dollara, jafnvirði rúmlega 500 milljarða króna, til uppbyggingar í landinu eftir átök við Rússa í ágústmánuði.

Þetta var niðurstaða á fundi fulltrúa yfir 70 samtaka og ríkja í Brussel í dag sem framkvæmdastjórn Evrópusambandsins og Alþjóðabankinn stóðu fyrir. Fulltrúar Evrópusambandsins sögðu upphæðina umtalsvert hærri en búist hefði verið við, ekki síst þegar litið væri til þeirrar erfiðu stöðu sem nú væri í heiminum.

Mikil þörf er á aðstoð í Georgíu eftir átök þeirra við Rússa vegna sjálfsstjórnarhéraðanna Suður-Ossetíu og Abkasíu. Þannig eru 65 þúsund manns á vergangi eftir átökin en einnig þarf peninga til þess að byggja upp innviði og endurvekja traust á landinu.