Segist einungis hafa átt í steraviðskiptum við annan bróðurinn

Annþór Kristján Karlsson sem sat í einangrun vegna svokallaðs UPS smyglmáls neitar að hafa komið nálægt innflutningi á fíkniefnunum. Samkvæmt heimildum Vísis segist hann við yfirheyrslur einungis hafa átt í steraviðskiptum við annan bróðurinn sem handtekinn var vegna málsins.

Í Fréttablaðinu í morgun kemur hinsvegar fram að Lögreglu þyki framburður Annþórs afar ótrúverðugur og mun hann hafa orðið margsaga um einstök atvik málsins.

UPS smyglmálið snýst um innflutning á 4,6 kílóum af amfetamíni og 600 grömmum af kókaíni. Þrír menn, auk Annþórs, voru handteknir vegna málsins. Það eru bræðurnir Jóhannes Páll og Ari Gunnarssynir auk æskuvinar þeirra Tómasar Kristjánssonar.

Tómas var starfsmaður hraðflutningafyrirtækisins UPS en fíkniefnin fundust í bíl frá fyrirtækinu þann 15.nóvember á síðasta ári. Fram hefur komið í fjölmiðlum að rannsókn lögreglu hafi leitt í ljós að innflutningur á fíkniefnum í gegnum fyrirtækið hafi staðið yfir síðan á vormánuðum 2005.

Bræðrunum hefur verið sleppt en Tómas mun sitja í gæsluvarðhaldi til 18.apríl.

Samkvæmt heimildum Vísis hefur Annþór alfarið neitað því að tengjast innflutningi á fíkniefnunum en viðurkennir í yfirheyrslum að hafa átt í steraviðskiptum við Ara Gunnarsson.

Þeir hafi kynnst þegar Annþór kom úr afplánun í ágúst á síðasta ári eftir að hann fór að æfa niður í World Class, en Ari var einkaþjálfari í líkamsræktarstöðinni á þeim tíma. Annþóri var sagt að Ari væri maðurinn sem gæti útvegað stera.

Í framhaldi af því hafi Annþór keypt af honum stera og þeirra viðskipti hafi einungis verið á þeim nótunum. Lögregla telur hinsvegar að Annþór hafi komið að fjármögnun, skipulagningu og innflutningi fíkniefnanna.

Þegar Annþór var handtekinn í tengslum við UPS málið fann lögregla töluvert magn af sterum í húsleit sem gerð var á heimili Annþórs í kjölfarið.

Nú er beðið eftir niðurstöðum úr tölvugögnum sem lögreglan lagði hald á í tengslum við málið. Þeirra er að vænta á næstu vikum.

Karl Georg Sigurbjörnsson verjandi Annþórs vildi ekkert tjá sig um málið þegar eftir því var leitað við vinnslu fréttarinnar.